Emma Blankın son günləri

Böyük şəhərdənkənar malikanədə yaşayan və ölümcül xəstə olan Emma Blank ömrünün son çağlarını qulluqçularının əhatəsində keçirir. Qayğıya və sevgiyə ehtiyac duyan bu sərt qadın eyni zamanda evdəki hər kəsin həyatını dözülməz bir hala gətirir. Onun şıltaqlıqları getdikcə məntiqsizləşir, əmrləri qətiləşir və qəzəb tutmaları getdikcə daha qorxulu forma alır.

Nökər Haneveld, aşpaz Bella, qulluqçu Qonni və fəhlə Meyer bu təzyiqlərə güclə dözürlər. İşçilərin tək ümidi amansız sahibənin vəsiyyətnaməsində pay almaq olur. Lakin vəsiyyətdə heç bir payın nəzərdə tutulmadığını anlayan xidmətçilər illərlə çəkdikləri əziyyətin əvəzini qisasla almaq qərarına gəlirlər.

«De laatste dagen van Emma Blank» filmi dram və komediya janrlarını bir araya gətirir. Niderland istehsalı olan bu ekran əsərini 2009-cu ildə rejissor Aleks van Varmerdam çəkib. Əsas rolları Jene Bervuts, Mərvan Kenzari, Marlis Heyer və Annet Malherb canlandırıb.