Laplandiya odisseyası

Laplandiyada yaşayan və müavinətlə dolanan Yanne günlərini məqsədsiz keçirir. Sevgilisi İnari onun bu cür məsuliyyətsizliyindən bezib. Nəhayət, Yannenin rəqəmsal TV qəbuledicisi almaq üçün verilən pulu başqa şeyə xərcləməsi qadının səbrini daşırır. İnari səhərə qədər bu cihazı evə gətirməyi, əks halda münasibətlərinə son qoyacağını bildirir.

Cihazı tapmaq məqsədilə iki dostu ilə yola çıxan qəhrəman gözlənilməz sınaqlarla üzləşir. «Napapiirin sankarit» filminin personajları gecə boyu müxtəlif maneələr, aldadıcı vəziyyətlər və rusiyalı turistlərlə qarşılaşaraq vaxtla yarışır.

2010-cu ildə çəkilmiş ekran əsərinin rejissoru Dome Karukoskidir. Finlandiya, İsveç və İrlandiya istehsalı olan bu komediya dramında rolları Yussi Vatanen, Tommi Liski, Kari Koyvukanqas və Sinikka Mokkila canlandırıb.