Gəlin

Əyalətdən olan tələbə Olya Milad ərəfəsində güzgü qarşısında fala baxarkən Saşanın əksini görür. Hələ məktəb vaxtı küçədə ilk baxışdan sevdiyi bu gəncin taleyin nişanəsi olduğuna inanan qız onu axtarmağa yollanır. Lakin Saşanın yaşadığı ünvana çatanda dəhşətli xəbərlə qarşılaşır: dostunun qisasını almaq üçün Çeçenistana yollanan gənc orada həlak olub və həmin gün onun dəfni keçirilir.

Aradan beş il ötür. Olya hissləri olmasa da, gələcəyini qurmaq məqsədilə fəal və inadkar Sergey ilə ailə qurmağa hazırlaşır. Lakin toya az qalmış qəfil kor bağırsaq tutması səbəbindən gənc qız təcili xəstəxanaya çatdırılır. Bu tibb müəssisəsinin divarları arasında onun qarşısına gözlənilməz sınaqlar və əsl xoşbəxtlik çıxır.

2006-cı ildə ekranlara çıxan Rusiyanın «Gəlin» (Невеста) filminin rejissoru Elyor İşmuxamedovdur. Melodram janrında olan filmdə baş rolları Şamil Xamatov, Maksim Vajov, Stanislav Jitarev və Yelena Lipskaya canlandırıb.