Green and Gold

«Green and Gold» dramının hadisələri 1990-cı illərdə Viskonsin ştatında cərəyan edir. Yaşlı fermer Bak həyat yoldaşı Marqaret və valideynlərini itirmiş nəvəsi Cenni ilə birlikdə təsərrüfatla məşğul olur. Bak torpağı nəvəsinə saxlamaq istəsə də, Cenninin arzusu böyük şəhərə köçüb musiqi karyerası qurmaqdır.

Bank borcları ailənin bütün planlarını alt-üst edir. Təxirə salınmış ödənişlərə görə bankir Cerri fermanı ələ keçirmək niyyətindədir, lakin Bak onunla qeyri-adi bir razılaşma bağlayır: sevimli futbol komandası həlledici oyunda qalib gəlsə, mülk ailədə qalacaq. Eyni zamanda qəsəbəyə tanınmış müğənni Billi təşrif buyurur və Cenni öz mahnılarını ona təqdim etməyə çalışır.

2024-cü ildə ABŞ-da istehsal olunmuş filmin rejissoru Anders Lindvolldur. Ekran əsərində əsas obrazları Meri Bley, Encel Çill III Pedraza, Marsi Menkott və Filip Bley canlandırıblar.