Üsama

Hadisələr Əfqanıstanda taliblərin hakimiyyəti dövründə cərəyan edir. Sərt qaydalar qadınlara yanlarında kişi qohumu olmadan küçəyə çıxmağı qəti şəkildə qadağan edir. Dolanışıq vasitələrindən tamamilə məhrum qalmış yoxsul bir ana çıxılmaz vəziyyətə düşərək qızını oğlan cildinə salmaq qərarına gəlir.

Saçları kəsilən və oğlan geyimi geyindirilən balaca qız çörəkpulu qazanmaq üçün işləməyə başlayır. Ən kiçik bir səhvin faciəyə səbəb ola biləcəyi bu mühitdə o, ətrafındakılardan əsl kimliyini gizlətmək və qorxu içində yeni adına öyrəşmək məcburiyyətində qalır.

2003-cü ildə ekranlara çıxan «Osama» filmi Əfqanıstan, İran, Yaponiya, İrlandiya və Niderland kinematoqrafçılarının birgə layihəsidir. Rejissor Siddiq Barmaqın çəkdiyi dram janrlı bu filmdə baş rolları Marina Qolbahari, Zübeydə Səhər, Məhəmməd Xarif Xərati və Həmidə Rəfah canlandırıb.