Gözəl insan

On altı yaşlı Juni anasının vəfatından sonra yeni məktəbə köçməli olur. Həmin mühitə uyğunlaşmaqda ona əmisi oğlu Matias kömək edir və qızı öz dost çevrəsi ilə tanış edir. Cazibədar qız sinifdəki bir çox oğlanın diqqətini çəksə də, o, aralarındakı ən sakit və diqqətdən kənar qalan Otto ilə münasibət qurmağı seçir.

Lakin bir müddət sonra hər şey dəyişir və Juninin qəlbində italyan dili müəllimi Nemura qarşı güclü hisslər oyanır. Bu sevginin gələcəyi olmasa da, gənc qız daxilindəki alovu söndürmək istəmir və maneələrə baxmayaraq xoşbəxt olmağa çalışır.

Fransa istehsalı olan «Gözəl insan» (La belle personne) filmi 2008-ci ildə rejissor Kristof Onore tərəfindən ekranlaşdırılıb. Dram və komediya janrlarını birləşdirən layihənin baş rollarında Lea Seydu, Alis Büto, Esteban Karvaxal-Aleqriya və Matilda İnserti çəkiliblər.