Sakit bir yer

Yer üzünü yalnız səsə reaksiya verən təhlükəli yırtıcı varlıqlar bürüyüb. İki uşaqlı bir ailə sağ qalmaq üçün gözdən uzaq bir fermada məskunlaşıb. Canavarların diqqətini çəkməmək məqsədilə ailə üzvləri xüsusi işarət dilindən istifadə edir və gündəlik işlərini tam səssizlik şəraitində görür.

Etdikləri hər bir hərəkət son dərəcə diqqətli olmağı tələb edir, çünki ən kiçik səs belə faciəyə səbəb ola bilər. Təhlükəsizliyi təmin etmək üçün xüsusi qaydalar qoysalar da, uşaqların böyüdüyü bir evdə hər zaman mütləq səssizliyi qorumaq olduqca çətindir.

ABŞ istehsalı olan «A Quiet Place» qorxu və dram filmi 2018-ci ildə nümayiş olunub və eyniadlı franşizanın əsasını qoyub. Ekran əsərinin rejissoru baş rollardan birini canlandıran Con Krasinskidir. Digər əsas obrazları Emili Blant, Milli Simmonds və Noa Cup canlandırıb.