Payız nağılı

«Payız nağılı» (Conte d'automne) filmi şərabçılıqla məşğul olan qırx beş yaşlı dul qadın Maqalidən bəhs edir. Övladları böyüyüb evi tərk etdikdən sonra o, özünü tənha hiss etməyə başlayır. Rəfiqəsinin bu vəziyyətinə dözməyən İzabel onun üçün yeni həyat yoldaşı axtarmağa qərar verir. İzabel Maqalidən xəbərsiz qəzetdə elan yerləşdirir və Gerald adlı münasib bir namizədlə tanış olur.

Eyni vaxtda Maqalinin oğlunun sevgilisi Rozin də qadının taleyini dəyişmək istəyir. O, gələcək qayınanasını vaxtilə eşq yaşadığı fəlsəfə müəllimi Etyenlə tanış etməyi planlaşdırır. Nəticədə İzabelin qızının toy mərasimində heç nədən xəbəri olmayan Maqali eyni anda hər iki kişi ilə üz-üzə gəlir.

Ekran əsərini 1998-ci ildə fransız rejissoru Erik Romer ərsəyə gətirib. Əsas rollarda Beatris Roman, Didye Sandr, Aureliya Alkais və Aleksiya Portal çəkiliblər. Ekran işi rejissorun dörd fəsil silsiləsinə daxildir.