Balkanlı oğlan

On iki yaşlı Marko Şimali Makedoniyanın gözdən uzaq, tərk edilmiş bir qəsəbəsində böyüyür. Evdə daima içki düşkünü olan atası ilə qarşılaşan yeniyetmə məktəbdə isə həmyaşıdlarının qəddarlığına dözməli olur. Həyatında düzgün dayaq tapmayan uşaq kimsəsiz evdə gizlənən qaçaq bir terrorçu ilə tanış olur və bir müddət onu özünə nümunə seçir.

Yeniyetməyə kömək etmək istəyən yeganə şəxs isə məktəb müəllimidir. O, Markonun ədəbiyyat müsabiqəsində qalib gələcəyinə və Parisə yollanaraq bu mühitdən xilas olacağına inanır. Lakin yaxşı niyyətli olsa da, cəsarətsiz və iradəsiz olan bu adamın verdiyi ümid Markonun ağrı-acılarını daha da uzadır.

«Balkanlı oğlan» (Iluzija) adlı dram filmi rejissor Svetozar Ristovski tərəfindən lentə alınıb. Şimali Makedoniya istehsalı olan bu ekran əsəri 2004-cü ildə işıq üzü görüb. Əsas rolları Petar Mirçevski, Todor Yonovski, Ivica Mackinoski və Marija Sikalovska canlandırıblar.