İtmiş ulduz

Vincenso adlı italyan mühəndis işlədiyi zavodun qüsurlu avadanlıq satdığını öyrənir. Buraxılmış səhvi düzəltmək qərarına gələn mütəxəssis dərhal Çinə yola düşür. Məqsədinə çatmaq üçün o, Li adlı yerli tərcüməçi qadınla birgə böyük ölkənin içərilərində həmin fabriki axtarmağa başlayır.

Uzaq yollarda Vincenso Şərq dünyasının ona yad olan fərqli cəhətləri ilə tanış olur. İtaliyalı mühəndis ilə çinli bələdçisi arasındakı mədəni fərqlər böyük olsa da, birgə axtarışlar onları bir-birinə yaxınlaşdırır. Sadə xidməti ezamiyyət getdikcə qəhrəmanın öz daxili dünyasına yönələn mühüm bir səfərə çevrilir.

«İtmiş ulduz» dram filmi 2006-cı ildə rejissor Canni Amelio tərəfindən lentə alınıb. İtaliya, Fransa, İsveçrə və Sinqapurun birgə istehsalı olan bu kinoda baş rolları Sercio Kastellitto, Tay Lin, Ancelo Kostabayl və Hiu Sun Ha canlandırıblar.