Sonuncu rəqs

Toy təşkilatçısı Dominik pandemiya dövründə gəlir mənbəyini itirir və ağır borc yükü ilə üz-üzə qalır. Maddi çətinliklərdən çıxış yolu axtaran qəhrəmana gözlənilməz təklif gəlir: təqaüdə çıxmağa hazırlaşan dəfn agenti öz işini ona təhvil vermək istəyir. Yeni sahədə çalışmağa başlayan Dominik tamamilə fərqli bir aləmə daxil olur.

İşləri davam etdirmək üçün o, qədim dəfn ayinlərini icra edən daosizm ruhanisi Mən Kvok ilə birlikdə fəaliyyət göstərməlidir. Ənənələrə qətiyyətlə bağlı olan bu mühafizəkar din xadimi ilə müasir düşüncəli, praqmatik Dominik arasında baxış ayrılıqları dərhal özünü büruzə verir. Onların məcburi tərəfdaşlığı peşəkar və şəxsi toqquşmalara səbəb olur.

«Sonuncu rəqs» (Po dei juk) dram filmi 2024-cü ildə Honq-Konqda çəkilib. Layihənin rejissoru Anselm Çandır, əsas rolları isə Maykl Xuey, Dayo Von, Mişel Vay və Tommi Çu ifa ediblər.