Asanlıqla sınmayanlar

Deyv Conson peşəkar beysbol liqasında oynamağı arzulasa da, aldığı zədə onun karyerasına son qoyub. İndi o, uşaqları məşq etdirir və kiçik layihə bürosuna rəhbərlik edir. On illik ailə həyatından sonra Deyv karyerasında uğur qazanan həyat yoldaşı Klaris və onun anası Merinin daimi təzyiqləri ilə üz-üzə qalır.

Avtomobil qəzası ailədəki soyuqluğu daha da dərinləşdirir. Ağır xəsarət alan Klaris evdə qalmağa məcbur olur, anası isə baş verənlərdə Deyvi günahlandırır. Yaranmış gərginlik fonunda Deyv arvadının fizioterapevti, tək ana olan Culiya ilə yaxınlaşır və bu ünsiyyət onda ailə istiliyinə və atalıq hisslərinə yeni bir istək oyadır.

ABŞ istehsalı olan «Asanlıqla sınmayanlar» (Not Easily Broken) melodram filmi 2009-cu ildə rejissor Bill Dük tərəfindən çəkilib. Ekran əsərində baş rolları Morris Çestnat, Taraci P. Henson, Meyv Kuinlan və Kevin Hart canlandırıblar.