Əyyaş Rafael

Rafael de Lorris həyatdan çoxdan küsüb və günlərini əyləncələrlə, içki məclislərində puç edir. O, məhvə doğru getdiyini bilsə də, vəziyyəti dəyişmək üçün heç bir addım atmır. Bir axşam ziyafətdə qarşılaşdığı Avrora de Şerua adlı zadəgan qadın ona etinasız yanaşaraq adını belə yadda saxlamayacağını bildirir. Bu soyuq münasibət qüruruna toxunan Rafael qadının qəlbini fəth etməyi qarşısına məqsəd qoyur.

Rafaelin cəhdləri nəticə verir və Avrora əvvəllər lağ etdiyi güclü hisslərə qapılır. Lakin qadının sevgisinə qarşılıq verməkdən imtina edən kişi öz dağıdıcı vərdişlərindən əl çəkə bilmir və aralarındakı sərhədi keçməyəcəyini deyir. Rədd cavabından sarsılan Avrora qisas və çarəsizlik hissi ilə qoca bir kişi ilə evlənir, Rafael isə ölüm astanasında ona sonuncu dəfə baş çəkir.

1971-ci il istehsalı olan «Əyyaş Rafael» filmi fransız rejissoru Mişel Devil tərəfindən ekranlaşdırılıb. Melodram janrındakı ekran əsərində baş rolları Moris Rone, Fransuaza Fabian, Jan Vilar və Brijit Fosse canlandırıblar.