Uğurlu nikah

Evli kişilərlə perspektivsiz münasibətlərdən bezən Sabina şəxsi həyatında qəti addım atmaq qərarına gəlir. O, artıq qeyri-müəyyən görüşlərə vaxt itirmək istəmir və layiqli bir insanla ailə qurmağı hədəfləyir. Bu məsələdə ona yaxın rəfiqəsi Klarissa yardım etməyə çalışır və onu öz əmisi oğlu Edmonla tanış edir.

Sabina rəfiqəsinin də dəstəyi ilə Edmonla daha sıx bağ qurmaq üçün əlindən gələni edir. Lakin gənc qadının bu qətiyyətli təşəbbüsləri qarşı tərəfdə eyni həvəsi yaratmır. Kişi bu münasibətə kifayət qədər soyuqqanlı yanaşır və tələsmək fikrində görünmür.

Fransa istehsalı olan «Le beau mariage» filmi 1982-ci ildə rejissor Erik Romer tərəfindən çəkilib və onun «Komediya və atalar sözləri» silsiləsinə daxildir. Ekran işində əsas rolları Beatris Roman, Andre Düssolye, Fedor Atkin və Ariel Dombal canlandırıblar.