Möhtəşəm

Avropanın mənzərəli qəsrində iki nüfuzlu biznes ailəsinin övladları üçün təşkil olunan toy mərasiminə hazırlıq gedir. Bipin Arora övladlığa götürdüyü qızı Aliyanı çox sevir, lakin evdə bütün qərarları qıza soyuq yanaşan Kamla verir. Ailənin böyük qızı Eşa isə Robin Fandvani ilə evlənməyə hazırlaşır.

Təntənəli şənliyin arxasında əsl həqiqət gizlənir: hər iki tərəf iflas həddindədir və bu nikah vasitəsilə vəziyyətdən çıxış yolu axtarır. Gizli ailə sirləri üzə çıxdıqca yuxusuzluqdan əziyyət çəkən iki gənc arasında romantik hisslər yaranır. Beləliklə, hesablanmış evlilik planları gözlənilməz hadisələrlə müşayiət olunur.

«Möhtəşəm» (Shaandaar) filmi Hindistan kinematoqrafçıları tərəfindən dram, komediya və melodram janrlarında lentə alınıb. 2015-ci ildə nümayiş olunan ekran işinin rejissoru Vikas Bahldır. Baş rollarda Şahid Kapur, Alia Bhatt, Pankac Kapur və Sancay Kapur çıxış edirlər.