Sibel

İyirmi beş yaşlı Sibel Türkiyənin Qara dəniz sahilində, dağlar qoynunda yerləşən ucqar bir kənddə atası və bacısı ilə birlikdə qalır. Danışa bilməyən gənc qadın ətrafındakılarla qədim yerli fit dili vasitəsilə ünsiyyət qurur. Kənd camaatı tərəfindən kənarlaşdırılan Sibel qonşu meşədə dolaşdığı deyilən və qadınlar arasında qorxu yaradan canavarın izinə düşür.

Meşənin dərinliklərində axtarış apararkən o, gizlənən yaralı bir fərari ilə rastlaşır. Köməksiz vəziyyətdə olan bu yad adam Sibellə qarşılaşdıqda ona kənd sakinlərindən tamamilə fərqli nəzərlərlə baxan ilk insan olur.

2018-ci il istehsalı olan «Sibel» dram filminin rejissorları Qiyom Covanetti və Çağla Zəncircidir. Türkiyə, Fransa, Almaniya və Lüksemburqun birgə layihəsi olan ekran əsərində baş rolları Damla Sönməz, Ərkan Kolçak Köstəndil, Emin Gürsoy və Elit İşcan canlandırıb.