Operanın kabusu

İstedadlı bəstəkar insanların sevgisini qazanmaq üçün şeytanla sövdələşmə bağlayır, lakin bu müqavilə onun simasını tanınmaz dərəcədə eybəcərləşdirir. Qorxunc görkəmini maska arxasında gizlədən bu adamı yalnız əsərlərinin notlarını yox etməklə öldürmək mümkündür. İllər sonra gənc müğənni Kristin Dey kitabxanada qədim, yanmış not vərəqləri tapır və dinləmədə həmin parçanı oxuyaraq XIX əsrin Londonuna düşür. Burada o, Operanın Kabusu kimi tanınan həmin musiqiçinin diqqətini çəkir.

Qız bəstəkar üçün əvəzolunmaz ilham mənbəyinə çevrilir və onda güclü ehtiras hissi oyadır. Sevdiyi qadının uğuruna mane olan hər kəsi amansızlıqla qətlə yetirən və qurbanlarının dərisini soyan kabus onunla qovuşmağı arzulayır. Lakin Kristinin qəlbi artıq başqa bir insana məxsusdur.

1989-cu ilin istehsalı olan «Operanın kabusu» filminin rejissoru Dvayt H. Littldır. ABŞ, Böyük Britaniya və Macarıstanın birgə ərsəyə gətirdiyi qorxu filmində əsas obrazları Robert İnqlund, Cill Şolen, Aleks Hayd-Vayt və Bill Nayi canlandırıblar.