Hey Sinamika

Proqram mühəndisi Yazan və hava tədqiqatçısı Mouna Koçidəki kafelərin birində təsadüfən tanış olurlar. Bir-birinə tez bağlanan gənclər çox keçmədən ailə qurmağa qərar verirlər. Lakin birgə həyatın ikinci ilində Mouna ərinin həddindən artıq qayğısından, tükənməz söhbətlərindən və daimi nəzarətindən ciddi şəkildə yorulmağa başlayır.

Artıq bu vəziyyətə dözə bilməyən qadın evliliyə son qoymaq niyyətinə düşür və ailə psixoloqu doktor Malarviji ilə əlaqə saxlayır. Səs-küysüz və rahat şəkildə ayrılmaq istəyən Mouna xüsusi plan qurur. O, psixoloqdan ərini özünə aşiq etməyi xahiş edir ki, Yazan başqa qadına meyil salaraq boşanmağa özü razı olsun.

Hindistan istehsalı olan «Hey Sinamika» melodram filmi 2022-ci ildə rejissor Brindha tərəfindən çəkilib. Baş rolları Dulkar Salman, Aditi Rao Hidari və Kacal Aqqarval canlandırır, heyətdə həmçinin Yoqi Babu da yer alır.