Gözlənilməz qonaq

Subbaya və Annapurna adlı yaşlı ər-arvad yetkin qızları Mallika ilə birlikdə ağır yoxsulluq içində gün keçirirlər. Ağır güzərandan bezən ailəyə bir gün öncəgörən şəxs talelərinin cəmi bircə gecədə dəyişəcəyini bildirir. Çox keçmədən qapını gecələməyə yer axtaran Şrinivas adlı yad bir adam döyür.

Ev sahibləri istəməsələr də, qonağı evə buraxmağa razılaşırlar. Lakin gələn şəxs pul və qızılla dolu çantasını göstərəndə ailənin baxışı tamamilə dəyişir. Birdən-birə üzə çıxan bu sərvət çarəsiz və ehtiyac içində yaşayan insanlarda güclü tamah hissi oyadır.

Hindistan istehsalı olan «Anaganaga O Athidhi» adlı dramatik triller filmi 2020-ci ildə ekranlara çıxıb. Ekran əsərinin quruluşçu rejissoru Daval Padmanabxandır, baş rollarda isə Payal Racput və Çaitanya Krişna çəkiliblər.