Çempion

ABŞ-da yaşayan koreyalı Mark bir vaxtlar qol güləşi üzrə çempion tituluna sahib idi. Lakin aradan keçən on il ərzində o, peşəkar arenanı tərk edərək klublarda və mağazalarda mühafizəçi işləməyə məcbur olub. Borclar içində çabalayan hiyləgər menecer Çin-gi idmançının istedadından istifadə edərək pul qazanmaq qərarına gəlir və onu yenidən yarışlara qatılmaq üçün Koreyaya qayıtmağa razı salır.

Doğma torpaqlara qayıdan Mark burada iki uşaq böyüdən kiçik bacısı ilə ilk dəfə qarşılaşır. Məlum olur ki, qadın da cinayətkarlara külli miqdarda borcludur və təzyiqlərlə üz-üzədir. Ailəsini qorumaq üçün onların yanına köçən keçmiş çempion, yaxınlarının verdiyi dəstək sayəsində idman masası arxasında əvvəlki gücünü yenidən hiss etməyə başlayır.

«Çempion» adlı idman dramı və komediyası 2018-ci ildə Cənubi Koreyada ekranlaşdırılıb. Filmin rejissoru Kim Yon-van, baş rol ifaçıları isə Ma Don-sok, Kvon Yul, Han Ye-ri və Çhve Sın-hundur.