İyirminci əsr

1900-cü ilin yayında İtaliyanın Emiliya bölgəsində iki oğlan uşağı dünyaya gəlir. Alfredo varlı torpaq sahiblərinin varisi kimi böyüyür, Olmo isə ehtiyac içində yaşayan böyük kəndli ailəsinin övladıdır. Təbəqə fərqinə baxmayaraq, bu iki uşaq arasında yaranan dostluq bağı uzun illər boyu davam edir.

Qəhrəmanların yeniyetməlik dövrü Birinci Dünya müharibəsinə, yetkinlik illəri isə İkinci Dünya müharibəsi və Mussolininin faşist rejiminə təsadüf edir. Sosialist hərəkatının gücləndiyi və kəndlilərlə mülkədarlar arasındakı ziddiyyətlərin kəskinləşdiyi bir dövrdə, cəmiyyətin dəyişən nizamı onların yoldaşlığını böyük sınaqlar qarşısında qoyur.

«Novecento» tarixi dram filmi İtaliya rejissoru Bernardo Bertoluççi tərəfindən ekranlaşdırılıb. İtaliya, Fransa və AFR-in birgə istehsalı olan bu film 1976-cı ildə təqdim olunub. Əsas obrazları Robert De Niro, Jerar Depardye, Dominik Sanda və Donald Sazerlend canlandırırlar.