Hey Jude

Koççi şəhərində yaşayan iyirmi səkkiz yaşlı Cud dəqiq riyazi təfəkkürə malik olsa da, cəmiyyət arasına çıxmaqda və insanlarla ünsiyyət qurmaqda böyük çətinlik çəkir. Qapalı xarakteri və qeyri-adi davranışları ucbatından gənc oğlan işini itirir, onun heç bir dostu da yoxdur. Sərt xasiyyətli atası isə oğlunun bu vəziyyətini anlamaq istəmir və ona tez-tez qəzəblənir.

Yaşlı qohumlarının vəfatından sonra ailə miras məsələlərini həll etmək üçün Qoa ştatına yola düşür. Cud burada yerli müğənni Kristal və onun keçmiş psixoloq olan atası ilə tanış olur. Bu gözlənilməz münasibətlər gəncin ətraf aləmə baxışını tədricən dəyişir və onu yeni insanlarla ünsiyyət qurmağa doğru addım atmağa sövq edir.

«Hey Jude» dram filmi 2018-ci ildə Hindistanda rejissor Şyamaprasad tərəfindən ekranlaşdırılıb. Ekran əsərində əsas rolları Nevin Pouli, Trişa Krişnan, Siddik və Vicay Menon canlandırıblar.