Filadelfiya

Uğurlu hüquqşünasın həyatı ağır və sağalmaz xəstəliyi üzə çıxandan sonra gözlənilməz məcraya yönəlir. İş yerindən əsassız yerə qovulan qəhrəman bu haqsızlıqla barışmır və hüquqlarını qorumaq məqsədilə məhkəməyə müraciət etmək qərarı verir.

Onun maraqlarını müdafiə etməyə tamamilə fərqli sosial təbəqədən, həyat tərzindən və dəri rəngindən olan başqa bir vəkil razılaşır. Dərin fikir ayrılıqlarına və ictimai qərəzlərə baxmayaraq, iki hüquqşünas ədaləti bərpa etmək üçün güclü rəqiblərlə mübarizə aparır.

1993-cü il istehsalı olan «Filadelfiya» dram filminin rejissoru Conatan Demmedir. ABŞ istehsalı ekran əsərində əsas rolları Tom Henks, Denzel Vaşinqton, Antonio Banderas və Ceyson Robards canlandırıb.