Kül

Karidad uzun müddətdir ki, atası Qalo ilə heç bir əlaqə saxlamır. Vaxtilə ağır ittihamlar və şübhələr səbəbindən ailəsini tərk edən ata illər boyu qızının həyatından tamamilə uzaq qalıb.

Kotopaxi vulkanının qəfil oyanması hər şeyi alt-üst edir. Ətrafı bürüyən kül buludları və artan təhlükə Karidadı köməksiz qoyur. Təhlükəsiz sığınacaq axtarışında olan gənc qadın çıxış yolunu illər sonra atasına müraciət etməkdə görür. Bu məcburi görüş ailənin köhnə sirlərini və unudulmaqda olan incikliklərini yenidən üzə çıxarır.

«Cenizas» («Kül») dram filminin rejissoru Xuan Sebastyan Xakomedir. Uruqvay və Ekvadorun birgə istehsalı olan 2018-ci il ekran əsərində baş rolları Samanta Kaysedo, Dieqo Naranxo, Xuana Estrella və Estela Alvares canlandırıb.