Merilin

On yeddi yaşlı Markos Argentina kəndlərinin birində icarəyə götürülmüş fermada valideynləri və böyük qardaşı ilə birlikdə yaşayır. Mühafizəkar mühitdə gənc oğlan ağır fiziki işi və ona aşılanan ənənəvi kişilik anlayışlarını qəbul etməkdə çətinlik çəkir. O, ailəsindən gizlin şəkildə qadın paltarları tikir, makiyaj edərək daxili kimliyini kəşf etməyə çalışır.

Kənddə təşkil olunan karnaval vaxtı Markos cəsarətini toplayaraq hamının qarşısına Merilin adı ilə qadın qismində çıxır. Lakin bu addım yerli gənclərin zorakılığı ilə nəticələnir. Oğlunun bu sirrini öyrənən ana isə onu qətiyyətlə rədd edir və gizlətdiyi bütün paltarları oda qalayıb yandırır.

«Merilin» dram filminin rejissoru Martin Rodriqes Redondodur. 2018-ci ildə nümayişə girən bu ekran əsəri Argentina və Çili kinematoqrafçılarının birgə layihəsidir. Baş rolları Valter Rodriqes, Katalina Saavedra, Xerman de Silva və İqnasio Ximenes canlandırıb.