Satılmış

On üç yaşlı Lakşmi Nepalın dağ kəndlərinin birində yoxsulluq içində böyüyür. Məktəbə gedən və ailəsinə yardım etmək üçün çalışan qız ətrafındakı kiçik şeylərdən sevinc tapmağa çalışır. Doğma ocaqları hər şeyini itirdikdə ögey ata onu varlı bir qadınla tanış edir. Bu qadın Lakşmiyə zəngin bir evdə xidmətçi işləyəcəyini vəd edir və yeniyetmə qız yaxınlarına dayaq olmaq ümidi ilə yola çıxır.

«Xoşbəxtlik Evi» adlı məkana çatan Lakşmi tezliklə fahişəxanaya satıldığını öyrənir. Qadın alveri ilə məşğul olan yerin sahibi ailəsinin borcu bitənə qədər onun buradan çıxa bilməyəcəyini bildirir. Qaranlıq günlərdə ona yalnız anasının hər çətinliyə rəğmən yaşamağın özünün bir zəfər olması barədə dediyi sözlər güc verir.

«Satılmış» dram filmi 2014-cü ildə rejissor Ceffri D. Braun tərəfindən ABŞ-da lentə alınıb. Baş rollarda Gillian Anderson, Devid Arkett, Priyanka Bose və Tilotama Şom çəkiliblər.