Alanis

Özünə Alanis adını seçən gənc ana Mariya hələ hamilə ikən ucqar əyalətdən Buenos-Ayresə köçüb. Nə bir sənəti, nə də arxalanacaq birisi olan gənc qadın körpə oğlu ilə birgə böyük şəhərdə ayaqda qalmağa çalışır. Çörək pulu qazanmaq və uşağı dolandırmaq üçün o, fahişəliklə məşğul olmağa məcbur qalır.

Yeganə rəfiqəsinin həbs olunması ilə vəziyyət daha da çətinləşir və ev sahibi Alanisi körpəsi ilə birlikdə küçəyə atır. Qalacaq yeri qalmayan ana kömək üçün xalasının qapısını döyür. Xalası xeyirxah insan olsa da, onun həddindən artıq qapalı və mühafizəkar baxışları qadının həyatını yeni sınaqlarla üz-üzə qoyur.

«Alanis» dram filmi argentinalı rejissor Anahi Berneri tərəfindən lentə alınıb. Baş rolu Sofiya Qala canlandırıb, digər obrazları isə Dante Della Paolera, Dana Basso və Silvina Sabater ifa ediblər. Argentina istehsalı olan bu ekran əsəri 2017-ci ildə nümayiş olunub.