Çiçəklənən bağ

Braziliyalı qadının Argentinaya yay tətili gözlənilməz faciə ilə nəticələnir: onun əri qəfil həyatını itirir. Qadın yad ölkədə tək qalaraq həyat yoldaşının cənazəsini təhvil almaq məcburiyyətindədir. Rəsmi qurumların süründürməçiliyi və bitmək bilməyən gözləntilər onun zaman anlayışını itirməsinə və reallıqdan uzaqlaşmasına səbəb olur.

Qaldığı mənzil çoxsaylı dibçək bitkiləri ilə dolu olsa da, kədər içində olan qadının onlara qulluq etməyə heç bir taqəti çatmır. Günlərin birində qonşu qadın bitkiləri sulamaq üçün ona yardım təklif edir. Bu gözlənilməz tanışlıq sayəsində baş qəhrəman dərdini bölüşə biləcəyi bir sirdaş tapır.

«Çiçəklənən bağ» (Vergel) dram filmi Argentina və Braziliya kinematoqrafçılarının birgə istehsalı kimi 2017-ci ildə ekranlara çıxıb. Əsərin rejissoru Kris Niklisondur. Əsas obrazları Kamila Morqadu, Marisel Alvares, Maria Alice Vergueiro və Daniel Faneqo canlandırıb.