Xilas evi

Daya adlı yaşlı kişi narahat yuxudan sonra ömrünün sona çatdığı qənaətinə gəlir və ruhunun qurtuluşu üçün müqəddəs Varanasi şəhərində ölmək istədiyini ailəsinə bildirir. Daim iş-güclə məşğul olan oğlu Raciv əvvəlcə atasının bu qərarına şübhə ilə yanaşsa da, işlərini təxirə salıb onunla birlikdə yola düşmək məcburiyyətində qalır.

Səyahətçilər Varanasiyə çataraq yalnız həyatının son anını gözləyənlər üçün nəzərdə tutulmuş sadə «Mukti Bhavan» («Hotel Salvation») mehmanxanasında məskunlaşırlar. Mehmanxana rəhbərinin qoyduğu sərt qaydaya əsasən, qonaqlara burada qalmaq üçün ən çoxu on beş gün vaxt verilir. Həmin müddət bitdikdən sonra vəfat etməyən sakinlər otağı boşaldıb dərhal evə dönməlidirlər.

2016-cı il istehsalı olan bu Hindistan dram komediyasını rejissor Şubhaşiş Bhutyani lentə alıb. Əsas rolları Adil Huseyn, Lalit Behl, Gitanjali Kulkarni və Palomi Qhoş paylaşıblar.