Təbaşir və silgi

Mumbay şəhərindəki orta məktəblərdən birində çalışan Vidya və Coti adlı iki müəllimə öz işlərinə böyük sevgi ilə yanaşırlar. Onlar şagirdlərlə səmimi münasibət qurur, uşaqların yüksək qiymətlərinə sevinir və onlara əxlaqi dəyərlər aşılamağa çalışırlar. Lakin Kamini Quptanın yeni direktor təyin olunması ilə məktəbin nizam-intizamı və idarəçiliyi kökündən dəyişir.

Yeni rəhbər xərcləri azaltmaq məqsədilə təcrübəli pedaqoqları işdən çıxarıb yerlərinə təcrübəsiz işçilər gətirmək qərarına gəlir və qənaət olunan vəsaitlə qəyyumlar şurası qarşısında öyünmək istəyir. Qəfil işdən çıxarılması Vidyanın infarkt keçirməsinə səbəb olur. Rəhbərlik digər müəllimlərə onunla əlaqə saxlamağı qadağan etsə də, Coti həmkarını tək qoymur və ona dayaq olur.

«Chalk N Duster» adlı hind dram filminin rejissoru Cayant Qilatardır. 2016-cı ildə çəkilmiş ekran əsərində baş rolları Şabana Azmi, Riça Çadha, Arya Babbar və Qavi Çahal canlandırıblar.