Bu mənim günahım deyil və ümumiyyətlə vecimə də deyil

Patrik Spenser insanlara ifrat dərəcədə eqoist olmağı aşılayan və bütün məsuliyyətdən qaçmağı təbliğ edən uğurlu fərdi inkişaf təlimçisidir. O, bu fəlsəfə sayəsində böyük sərvət qazansa da, ailə həyatında vəziyyət fərqlidir. Zərərli vərdişlərlə mübarizə aparan qızı Diana yerli narkotacir Conni «Üçbarmaq»dan növbəti dəfə qadağan olunmuş maddə alarkən atasının kimliyi üzə çıxır.

Qızın varlı ailədən olduğunu anlayan Conni borclu olduğu Brayanla birləşərək Diananı girov götürür və külli miqdarda pul tələb edir. Lakin hadisələr planlaşdırıldığı kimi getmir: öz prinsiplərinə sadiq qalan ata doğma övladı üçün fidyə ödəməkdən birmənalı şəkildə imtina edir. Nəticədə Patrik Spenserin həyat fəlsəfəsi real və təhlükəli bir sınaqla üz-üzə qalır.

«Bu mənim günahım deyil və ümumiyyətlə vecimə də deyil» (It's Not My Fault and I Don't Care Anyway) filmi Kanada istehsalı olan dram və komediya layihəsidir. 2017-ci ildə nümayiş olunan ekran işinin rejissoru Kristofer Krəddokdur, əsas rolları isə Alan Tik və Kuinton Aaron canlandırıb.