Xəyallar ölkəsi

Keçirdiyi yol qəzası istedadlı tennisçi Piterin karyerasına son qoyur. İdmanı tərk etdikdən sonra həyatını qaydaya salmağa çalışan gənc, anasının son günlərində yanında olmayan atası Arnini bağışlaya bilmir. Daxili gərginlik və ətrafa qarşı bəslədiyi qəzəb onu tədricən cəmiyyətdən uzaqlaşdırır.

Barların birində Piter boşanmış Tess adlı qadınla qarşılaşır. Hər ikisi bir-birinin ağrılarında təsəlli taparaq Piterin evində birgə yaşamağa başlayır. Qadın getmək istədikdə isə Piter ona kənar dünyadan büsbütün təcrid olunmağı və dörd divar arasında «Candiland» adlı şəxsi reallıqlarını yaratmağı təklif edir.

Psixoloji dram və triller janrında çəkilmiş Kanada istehsalı olan bu ekran işi 2016-cı ildə rejissor Rasti Nikson tərəfindən lentə alınıb. Filmin əsas rollarını Ceyms Kleyton, Çela Horsdal, Qari Byuzi və Lori Triolo ifa edir.