Onuncu adam

Ariel Nyu-Yorkdakı həyatını geridə qoyub uşaqlıq illərinin keçdiyi Buenos-Ayresə qayıdır. O, Onse adlı yəhudi məhəlləsində xeyriyyə təşkilatına rəhbərlik edən atası Uşerlə görüşüb münasibətlərini qaydaya salmaq istəyir. Lakin atası ilə üz-üzə gəlmək düşündüyündən qat-qat çətin olur.

Atası görüşü daim təxirə salaraq oğlu ilə yalnız telefonla danışır və fondun müxtəlif gündəlik işlərini onun boynuna qoyur. Verilən tapşırıqları yerinə yetirən Ariel tədricən məhəllənin qaynayan mühitinə daxil olur. Məhz burada o, təşkilatda könüllü kimi fəaliyyət göstərən, azdanışan Yeva adlı gənc qadınla tanış olur.

«El rey del Once» («Onuncu adam») filmi 2016-cı ildə Argentinada rejissor Daniel Burman tərəfindən çəkilib. Ekran əsərində baş rolları Alan Sabbaq, Xulyeta Silberberq, Usher Barilka və Elvira Onetto ifa edir.