Kayman

Bruno Bonomo vaxtilə ucuz janr filmləri sayəsində tanınan prodüser olsa da, uğursuz bir layihədən sonra sənətdən uzaqlaşmışdı. İllər sonra «RAI» şirkəti ona Xristofor Kolumbun vətənə qayıdışından bəhs edən yeni bir kino çəkməyi təklif edir. Rejissorun qəfil layihəni tərk etməsi səbəbindən çəkilişlər dayanır və Bruno çarəsizlikdən başqa bir hekayə təqdim etməli olur. Bu, gənc Tereza tərəfindən yazılmış və İtaliyanın baş naziri Silvio Berluskoni haqqında bəhs edən «Kayman» filminin ssenarisidir. Mövzu həddindən artıq qalmaqallı sayıldığı üçün heç bir şirkət onun istehsalını üzərinə götürmək istəmir.

Ailəsi dağılmaq ərəfəsində olan Brunonun şəxsi həyatı da tədricən məhvə doğru gedir. Boşanma prosesi və köhnə borcları tələb edən bankların təzyiqi altında qalan prodüser üçün bu mürəkkəb layihə həyatda qalmağın yeganə yoluna çevrilir. Hər kəsin çəkindiyi bu filmi ekranlara çıxarmaq mübarizəsi onun son ümidi olur.

«Kayman» filmi 2006-cı ildə İtaliya və Fransa kinematoqrafçıları tərəfindən ərsəyə gətirilib. Ekran əsərinin rejissoru Nanni Morettidir. Əsas obrazları Silvio Orlando, Marqerita Buy, Jasmin Trinka və Mikele Plaçido canlandırıb.