Chauthi Koot

Hadisələr 1984-cü ildə qorxu və gərginliyin hökm sürdüyü Pəncab bölgəsində cərəyan edir. Süjet xətti bir-biri ilə bağlı görünməyən iki fərqli əhvalatı birləşdirir. Birinci hissədə iki hindu dostun Amritsar şəhərinə çatmaq üçün göstərdiyi cəhdlər göstərilir.

İkinci hadisə isə beş ay əvvələ təsadüf edir və ailəsinin sevimli itini öldürmək məcburiyyətində qalan bir kəndlinin taleyindən bəhs edir. Hər iki xətt tədricən bir-birinə qovuşaraq hərbçilərlə siqh separatçıları arasında çıxılmaz vəziyyətdə qalan dinc sakinlərin çətin günlərini əks etdirir.

«Chauthi Koot» tarixi dram filmi rejissor Qurvinder Sinqh tərəfindən lentə alınıb. Fransa və Hindistanın ortaq istehsalı olan bu ekran əsəri 2015-ci ildə işıq üzü görüb. Əsas rolları Suvinder Vicky, Qurprit Bhanqu və Rajbir Kaur ifa ediblər.