Kafir

Londonda taksi xidməti işlədən Mahmud Nazir dinə elə də dərindən bağlı insan olmayıb. Lakin oğlu Uzma adlı xanımla evlənmək qərarına gəldikdə vəziyyət dəyişir. Qızın anası radikal baxışları ilə seçilən dini təbliğatçı Arşadla ailə qurduğundan, Mahmud yeni qohumların qarşısında özünü nümunəvi bir dindar kimi göstərməyə çalışır.

Elə həmin ərəfədə anasının sənədlərini araşdıran ata gözlənilməz bir faktla qarşılaşır: o, övladlığa götürülmə haqqında şəhadətnamə tapır. Sənəddən aydın olur ki, Mahmud əslində yəhudi ailəsində doğulub və onun əsl adı Soli Şimşiloviçdir.

Böyük Britaniya istehsalı olan «The Infidel» komediya-dram filmi 2010-cu ildə rejissor Coş Appinyanezi tərəfindən çəkilib. Baş rolları Omid Calili, İqal Naor, Stüart Skudamor və Ceyms Floyd canlandırıblar.