Ötmə

Hüquq təhsili alan utancaq tələbə Roberto öz iradəsindən kənar şəkildə dəbdəbəli və qayğısız həyatın içinə çəkilir. İncə təbiətli, lakin şıltaq və varlı Bruno onu avtomobillə birgə səyahətə çıxmağa razı salır. Beləliklə, iki fərqli xarakterə malik insan birlikdə Roma və Toskana yollarına üz tutur.

İki gün sürən bu qısa səfər ərzində yol yoldaşları bir-birlərinin ailələrinə baş çəkirlər. Roberto bu müddət ərzində sürətlə böyüyür və ətrafında baş verənlərə yeni gözlə baxmağa başlayır. O, zahirən bəxtəvər və uğurlu görünən Brunonun əslində daxilən bədbəxt bir insan olduğunu anlayır.

1962-ci ildə İtaliyada çəkilmiş «Il sorpasso» («Ötmə») filminin rejissoru Dino Rizidir. Dram və komediya janrlarını birləşdirən ekran əsərində Jak Stani, Klaudio Qora, Con Frensis Leyn və Edda Ferronao çəkiliblər.