Udon

Nyu-Yorkda stendap ustası olmaq arzusuna çata bilməyən Kosuke altı aydan sonra doğma şəhərinə qayıdır. Borc içində olan və xəyalları puç olan gənc pul qazanmaq üçün çıxış yolu axtarmağa başlayır. Beləcə, o, fəaliyyətini güclə davam etdirən yerli jurnal redaksiyasında işə düzəlir.

Kosukenin ağlına bölgənin əsas vizit kartı sayılan əriştə məkanları haqqında bələdçi hazırlamaq fikri gəlir. Bu təşəbbüs qısa zamanda böyük maraq doğurur və jurnal bütün ölkə miqyasında əsl sensasiyaya çevrilir.

2006-cı ildə ekranlara çıxan «Udon» filmi həm komediya, həm də dram çalarlarına malikdir. Yaponiya istehsalı olan bu ekran əsərinin rejissoru Katsuyuki Motohirodur, baş rolları isə Yusuke Santamaria, Manami Konishi, Tortoise Matsumoto və Kyoka Suzuki canlandırıb.