Meymun oyunu

Alim-kimyaçı insan toxumalarını bərpa edən və gəncliyi geri qaytaran vasitə hazırlamaq üçün laboratoriyada sınaqlar aparır. Tədqiqatçı təcrübələrində dəniz donuzları əvəzinə meymunlardan istifadə edir. Həyat yoldaşı isə ərini çox sevdiyindən onun dağınıqlığına və unutqanlığına hər zaman göz yumur.

Gözlənilmədən laboratoriyadakı meymunlardan biri qəfəsdən çıxaraq müxtəlif kimyəvi maddələri qarışdırır və həmin məhlulu su soyuducusuna tökür. Heç nədən xəbəri olmayan ər-arvad bu sudan içir. Qısa müddət sonra hər iki qəhrəmanın davranışlarında və vəziyyətində qəribə dəyişikliklər başlayır.

ABŞ istehsalı olan «Monkey Business» fantastik komediyasını 1952-ci ildə rejissor Hovard Houks çəkib. Əsas rolları Keri Qrant, Cincer Rocers, Çarlz Kobern və Merilin Monro ifa edirlər.