Dəhşət planeti

Arxeoloqlardan ibarət kiçik elmi qrup yadplanetli sivilizasiyanın qədim qalıqlarını araşdırmaq üçün uzaq planetdə yeraltı qazıntılar aparır. Tədqiqatçılar ilk olaraq insan şüuruna zərər vuran qəribə kristallar aşkar edirlər. Növbəti araşdırma zamanı isə mağaralarda gizlənən naməlum canlı onlara hücum çəkərək bir kişini öldürür və Sendi adlı qadını mayalandırır.

Bədənində yad məxluq böyüyən Sendi ağlını itirir və baza əməkdaşlarını öldürüb onların cəsədləri ilə bəslənməyə başlayır. Həmkarları qadını sakitləşdirməyə və hücumların qarşısını almağa çalışsa da, hər cəhd yeni itkilərlə nəticələnir. Nəhayət, onun əkiz körpələri dünyaya gəldikdə isə stansiyadakı insanların xilas yolu tamamilə bağlanır.

Britaniya istehsalı olan «Dəhşət planeti» elmi-fantastik qorxu filmi 1981-ci ildə nümayiş olunub. Layihənin rejissoru Norman C. Uorrendir, əsas rolları isə Cudi Qison, Cennifer Eşli, Barri Hoton və Robert Pyu canlandırıblar.