(Qeyri)mükəmməl qadın

Hadisələr 2038-ci ildə cərəyan edir. Şəxsi həyatında uğursuzluq yaşayan və sevgidən məyus olan sahibkar Aris dostlarından gözlənilməz bir hədiyyə alır. Bu, xarici görünüşcə insandan qətiyyən fərqlənməyən Elli adlı yeni nəsil qadın robotdur. O, ev işlərində kömək edir, maraqlı söhbətlər aparır və sahibinə diqqət yetirməyi bacarır.

Bir müddət sonra robotun sisteminə insan hisslərini və duyğularını əlavə edən xüsusi yenilənmə buraxılır. Aris tərəddüd etmədən bu proqramı quraşdırmağa qərar verir. Süni intellektin gerçək duyğular qazanması insanla onun texnoloji köməkçisi arasındakı gündəlik münasibətləri tamamilə yeni mərhələyə daşıyır.

«I gefsi tis agapis» fantastik filmi 2018-ci ildə Yunanıstanda rejissor Akis Polizos tərəfindən ekranlaşdırılıb. Melodram janrındakı ekran əsərində əsas rolları Helena Çarbila, Fanis Mouratidis, Albertos Fais və Melissanthi Mahut canlandırıb.