It's a Wonderful Knife

Milad ərəfəsində Vinninin həyatı alt-üst olur: mələk geyimində olan qatil onun ən yaxın rəfiqəsini qətlə yetirir və qardaşına hücum çəkir. Qorxmaz qız təslim olmayaraq cinayətkarı öldürür və həmin şəxsin yerli mer Henri Uoters olduğu üzə çıxır. Bir il sonra şəhər sakinləri bu faciəni xatırlamaq istəmir, Vinni isə itkisi ilə tək qalır. Üstəlik, sevgilisinin xəyanətindən xəbər tutan qız heç vaxt dünyaya gəlməməyi arzulayır.

Bu təsadüfi arzu gerçəkləşir və Vinni özünün mövcud olmadığı alternativ dünyaya düşür. Onun doğulmadığı bu yeni reallıqda sevimli şəhəri tənəzzülə uğrayıb, qarşısını kəsən kimsə olmadığı üçün qatil daha 27 nəfəri öldürüb.

«It's a Wonderful Knife» adlı qorxu və komediya filmi rejissor Tayler Makİntayr tərəfindən lentə alınıb. 2023-cü il istehsalı olan bu ekran əsəri ABŞ, Böyük Britaniya və Kanada kino şirkətlərinin birgə layihəsidir. Baş rollarda Coel Makheyl, Ketrin İzabel, Erin Boyes və Qreys Vukoviç çəkiliblər.