Head Count

Evan və Peyton qardaşları istirahət günlərini Coşua-Tri milli parkında birlikdə keçirməyi planlaşdırırlar. Məkana çatdıqda onlar tələbə qrupuna rast gəlirlər. Evan bu gənclərlə əylənmək istəyir, səs-küylü məclisləri sevməyən Peyton isə qardaşını tək qoyub digər dostlarının yanına yollanır.

Ocaq başında keçən gecə vaxtı Evan internetdə tapdığı cadunu ucadan oxuyur və fərqində olmadan təbiətüstü qüvvəni oyadır. Ortaya çıxan iblis gənclərin görkəmini məharətlə təqlid etməyi bacarır. Qədim ayini tamamlamaq istəyən bu varlığın məqsədi uşaqları beş nəfərlik qruplara bölməkdir.

«Head Count» filmi qorxu, fentezi və triller janrlarını bir araya gətirir. ABŞ istehsalı olan bu layihəyə rejissor Elle Kallahan rəhbərlik edib, əsas obrazları isə İsaak Cey, Cey Li, Eşli Morqan və Bevin Brü canlandırıblar. Ekran işi 2019-cu ildə işıq üzü görüb.