Favnın labirinti

Hadisələr 1944-cü ildə, İspaniyanın Navarra meşələrində partizanların frankoçulara qarşı döyüşdüyü dövrdə cərəyan edir. On yaşlı xəyalpərəst Ofeliya hamilə anası Karmenlə birlikdə ögey atasının hərbi düşərgəsinə köçür. Bu yerə rəhbərlik edən qəddar kapitan Vidal bölgəni üsyançılardan tamamilə təmizləməyə çalışır. Nağılları sevən Ofeliya evin yaxınlığındakı qədim və kimsəsiz bir labirint tapır.

Bir pərinin ardınca labirintin dərinliklərinə enən qız burada yeraltı dünyanın sahibi Favn ilə qarşılaşır. Qəribə varlıq bildirir ki, Ofeliya əslində sehrli səltənətin çoxdan itmiş şahzadəsidir və atası əsrlərdir onu axtarır. Öz krallığına qayıtmaq üçün o, bədirlənmiş ay çıxanadək heç kimə bildirmədən üç çətin sınaqdan keçməlidir.

«Favnın labirinti» adlı bu dramatik fentezi filmini rejissor Gilyermo del Toro çəkib. İspaniya və Meksikanın birgə istehsalı olan ekran əsəri 2006-cı ildə işıq üzü görüb. Baş rolları İvana Bakero, Serxi Lopes, Maribel Verdu və Daq Cons canlandırıblar.