Milad nəğməsi

Uzun illər birlikdə çalışdığı tərəfdaşının ölümündən sonra Ebenezer Skruc daha da qəddarlaşır və ətrafdakı insanlara qarşı nifrət bəsləməyə başlayır. Xəsis qocanın dözülməz xasiyyətindən və soyuq münasibətindən ən çox onun səbirli köməkçisi Bob Kretçit əziyyət çəkir.

Lakin Milad gecəsində Skrucun qarşısına fövqəltəbii ruhlar çıxır. Onlar qocaya keçmişini, bu gününü və acı gələcəyini göstərərək var-dövlət hərisliyi üzündən sevgidən və xoşbəxtlikdən məhrum olduğunu başa salırlar. Dəhşətli aqibəti görən Skruc həyat tərzini dəyişmək və qəlbini yaxşılığa açmaq üçün ruhlardan yeni bir şans istəyir.

«A Christmas Carol» filmi 1999-cu ildə ABŞ-da istehsal olunub və rejissor Devid Hyu Cons tərəfindən ekranlaşdırılıb. Fentezi dramının baş rollarında Patrik Stüart, Riçard E. Qrant, Coel Qrey və İen Maknis çəkiliblər.