Ruhla necə evləndim

Narkotik cinayətkarını təqib etdikdən sonra sübut toplayan polis əməkdaşı Vu Minhan yerdən təsadüfən qırmızı zərf tapır. Bu zərfi qəzada həyatını itirmiş nəvəsi Mao-Maonu axirət toyu adəti ilə evləndirmək istəyən yaşlı bir qadın qoyub. Dünyasını dəyişmiş bir kişi ilə ailə qurmaq fikrindən uzaq olan polis ard-arda gələn uğursuzluqlardan sonra məcburiyyət qarşısında qalıb bu qəribə ənənəyə razılıq verir.

İndi Minhan həm də ruh yoldaşının şıltaqlıqları ilə məşğul olmaq məcburiyyətində qalır. O, Mao-Maonun reinkarnasiya keçirib bu dünyanı tərk etməsi üçün onun yarımçıq qalmış arzularını yerinə yetirməlidir. Bu məcburi ittifaq həm polisin işini çətinləşdirir, həm də onu maraqlı hadisələrin içinə çəkir.

Fantastika, detektiv və komediya janrlarını birləşdirən «Ruhla necə evləndim» filmini rejissor Çenq Veyhao lentə alıb. Tayvan istehsalı olan bu ekran işi 2022-ci ildə nümayiş olunub. Əsas obrazları Qreq Syu, Ostin Lin, Cinql Van və Tsay Cen-nan canlandırıblar.