Torpaq

Anxel özünü qeyri-adi varlıq hesab edir: o, yarı insan, yarı mələk olduğunu, eyni zamanda həm diri, həm də ölü qaldığını düşünür. Qərarlarında isə kosmosun dərinliklərindən gələn sirli bir səsə güvənir. Bu daxili çağırış onu yerli şərabın qəribə dadının səbəbini araşdırmaq üçün kənd yerinə gətirib çıxarır.

Burada o, xaraktercə bir-birinə tamamilə zidd olan iki qadınla qarşılaşır: utancaq Anxela və cazibədar gənc Mari. Bu təsadüf Anxelin daxili dünyasını daha da qarışdırır. Hər iki qadının təsiri altına düşən qəhrəman ehtirasla sevgi, ağıl ilə dəlilik arasındakı fərqi anlamağa, həyatın və kainatın mahiyyətini dərk etməyə çalışır.

«Torpaq» (Tierra) dram, melodrama və fentezi janrlarını birləşdirən İspaniya filmidir. 1996-cı ildə ekranlara çıxan filmin rejissoru Xulio Medemdir. Baş rolları Karmelo Qomes, Emma Suares, Karra Elexalde və Silke canlandırıblar.