Yalnız aşiqlər sağ qalar

Yüzilliklər boyu dünyanı dolaşan iki qədim vampir tarixin ən keşməkeşli dövrlərini arxada qoyub. Onlardan biri olan Adam Detroytda tənha ömür sürür, andeqraund musiqi bəstələyir və «zombi» adlandırdığı adi insanlara nifrət bəsləyir. Onun çoxdankı sevgilisi Yeva isə Tanjerdə yaşayır, Şekspir dövrünün şairi Kristofer Marlo ilə ünsiyyət qurur və həyata daha böyük maraqla yanaşır.

Adamın getdikcə dərinləşən kədərini görən Yeva onu bu vəziyyətdən çıxarmaq üçün yanına yollanır. Lakin onların sakit gecələrini qəfildən gələn Yevanın şıltaq kiçik bacısı Ava pozur. Bu gözlənilməz qonaq iki aşiqin qurduğu həssas nizamı alt-üst edir.

2013-cü il istehsalı olan «Only Lovers Left Alive» dram və fentezi filmini rejissor Cim Carmuş lentə alıb. Böyük Britaniya, Almaniya, Fransa və Yunanıstanın birgə layihəsində baş rolları Tilda Suinton, Tom Hiddlston, Anton Yelçin və Mia Vasikovska canlandırıb.