Qədim sərdabənin axtarışında

Qüds yaxınlığındakı qazıntılar gənc arxeoloq Şteffen üçün ağlasığmaz bir kəşflə nəticələnir. İki min illik qəbirdə tapılan skeletin əlində hələ satışa çıxarılmamış ən müasir videokameranın təlimat vərəqi və üzərində İsanın adı qeyd olunan kağız parçası var. Tədqiqatçı hesab edir ki, bu şəxs keçmişə səyahət edib və çəkilən videolarda Məsihin real görüntüləri qala bilər.

Dünya dinlərinin əsaslarını sarsıda biləcək bu xəbər qüdrətli qüvvələr arasında ciddi mübarizəyə yol açır. Əlində kameranı tapmaq üçün şifrələnmiş qeydlər olan Şteffen hər tərəfdən təqib edilməyə başlayır. Canını qurtarmağa çalışan arxeoloq Negev səhrasında yerləşən və əfsanəyə görə İsanın simasını əks etdirən müqəddəs güzgünün saxlandığı monastıra üz tutur.

«Qədim sərdabənin axtarışında» filmi rejissor Sebastyan Niman tərəfindən ekranlaşdırılmış detektiv və döyüş elementli fantastik trillerdir. Baş rolları Matias Köberlin, Nayke Rivelli, Manu Lyubovski və Hans Dil canlandırıblar. Almaniya istehsalı olan bu ekran əsəri 2002-ci ildə nümayiş olunub.