Sindbadın qızıl səyahəti

Cəsur dənizçi Sindbadın əlinə sirli qızıl lövhəcik keçdikdən sonra onun yeni dəniz səfəri başlayır. Bu qədim əşya naməlum bir sirri gizlədən sehrli xəritənin parçası çıxır. Dənizçi tapmacanın ardınca getmək qərarına gəlir və sadiq komandası ilə birlikdə naməlum istiqamətə yelkən açır.

Səyahətçiləri dənizdə şiddətli fırtınalar, quruda isə qara sehrbaz Kuranın qurduğu tələlər gözləyir. Sinbad və yoldaşları yollarında altıqollu canlı heykəl, tək gözlü kentavr və nəhəng qrifon kimi təhlükəli varlıqlarla üzləşməli olurlar. Səfərin sonunda isə qəhrəmanı bütün bu sınaqların mükafatı gözləyir.

«Sindbadın qızıl səyahəti» macəra və fentezi filmi 1973-cü ildə rejissor Qordon Hessler tərəfindən ekranlaşdırılıb. ABŞ və Böyük Britaniyanın ortaq istehsalı olan layihədə baş rolu Con Fillip Lou canlandırıb, digər rolları isə Kerolayn Manro və Tom Beyker paylaşıblar.